Jose Paz e Nuria Sánchez informan da oferta formativa do CSHG a galegos residentes en México

O Centro Superior de Hostalería de Galicia (CSHG) reafirma o seu papel como referente na formación de profesionais do sector turístico a nivel internacional. No marco da visita institucional da Xunta de Galicia a México, o director do CSHG, Jose Paz, xunto co director da Axencia de Turismo de Galicia, Xosé Merelles, participaron nun encontro con empresarios galegos asentados no país azteca para analizar as oportunidades que ofrece Galicia para a formación, o retorno e o investimento no ámbito da hostalería e o turismo.

 

Durante a reunión, destacouse o papel do CSHG como unha das principais plataformas para a capacitación de futuros profesionais do sector, cunha alta taxa de inserción laboral tanto en Galicia como no resto do mundo. Jose Paz subliñou que os titulados do centro lograron posicionarse en destacadas cadeas e establecementos turísticos internacionais, o que reforza a proxección global da institución.

 

Ademais, presentouse o programa de prácticas en centros de traballo no que participan os alumnos do CSHG, facilitando o seu acceso a experiencias profesionais de primeiro nivel e contribuíndo ao seu desenvolvemento en contornas reais de traballo. “O CSHG non só forma profesionais altamente capacitados, senón que tamén lles proporciona as ferramentas e oportunidades necesarias para integrarse no mercado laboral con éxito”, afirmou Paz.

 

Pola súa banda, Xosé Merelles destacou a contribución do CSHG ao crecemento e profesionalización do sector turístico galego. Neste sentido, resaltou a importancia de seguir fortalecendo a conexión entre o centro e o empresariado galego no exterior, creando sinerxias que favorezan o retorno de talento e a internacionalización da marca Galicia no ámbito da hostalería e o turismo.

 

No encontro tamén se discutiron as iniciativas de apoio ao retorno e o investimento en Galicia, incluíndo as liñas de axuda para emprendedores e autónomos no sector, os programas de mentoring e os incentivos á contratación de persoal cualificado. Así mesmo, púxose en valor o impacto do turismo na economía galega, con cifras que reflicten un crecemento sostido e unha consolidación do destino Galicia como referencia no panorama turístico internacional.

 

O CSHG mantense así como un piar fundamental na estratexia da Xunta para fortalecer o sector, garantindo a formación de profesionais cunha visión global e un forte arraigamento na excelencia e a innovación en hostalería e turismo.